भाजपच्या प्रदेशाध्यक्ष चंद्रशेखर बावनकुळे यांच्या त्या वक्तव्याचा जाहीर निषेध

पत्रकारांना चहा पाजा, धाब्यावर जेवायला न्या, भाजपाचे प्रदेशाध्यक्षांचा पदाधिकाऱ्यांना अजब सल्ला

बाळासाहेब जाधव - संपादक

----------------------------------

नगर - पत्रकारांना २०२४ पर्यंत आपल्याविरोधात एकही बातमी छापू नये, यासाठी त्यांना चहा प्यायला घेऊन जा, त्यांना चहा प्यायला बोलवायचे म्हणजे समजलेच असेल तुम्हाला, असे सांगत त्यांना धाब्यावरही घेऊन जा, असा अजब सल्ला भाजपाचे प्रदेशाध्यक्ष चंद्रशेखर बावनकुळे यांनी नगर येथे भाजपा पदाधिकाऱ्यांच्या बैठकीत दिला.या वक्तव्याचा जलभूमी ग्रामीण पत्रकार संघाने प्रसिद्ध पत्रक काढून जाहीर निषेध केला.

बावनकुळे यांच्या उपस्थितीत रविवारी (दि. २४) शहरातील सावेडी येथील माउली सभागृहात महाविजय २०२४ विधानसभा पदाधिकारी संवाद बैठकीचे आयोजन करण्यात आले होते. यावेळी बुथरचना आणि पदाधिकाऱ्यांनी सांभाळायच्या जबाबदाऱ्या या विषयावर बावनकुळे यांनी उपस्थित पदाधिकाऱ्यांना मार्गदर्शन केले. ते म्हणाले, ज्या बुथवर तुम्ही काम कराल तेथे इलेक्ट्रॉनिक मीडियावाले कोण आहेत, पोर्टलवाले कोण आहेत हे पाहावे. आपण एवढे चांगले काम करतोय, पण हे असे काही टाकतात की, जणू गावात बॉम्बच फुटलाय. यासाठी बुथवर जे चार, पाच पत्रकार आहेत. त्यांची यादी तयार करा. यात एक, दोन पोर्टलवाले, प्रिंट आणि इलेक्ट्रॉनिकवाले असतील, त्यांना महिन्यातून एकदा चहा प्यायला बोलवा, चहा प्यायला बोलवायचे म्हणजे समजलेच असेल तुम्हाला. त्यात काही कमी जास्त झाले तर सुजय विखे आहेतच. असा धमकी वजा इशारा देण्यात आला. अशा इशाराला पत्रकार भिक घालत नाही. महाविजय २०२४ पर्यंत बुथच्या संदर्भात एकही बातमी विरोधात येणार नाही याची काळजी घ्या, सर्व सकारात्मक बातम्या आल्या पाहिजेत, याची काळजी घ्या, असे बावनकुळे म्हणाले.

प्रदेशाध्यक्ष बावनकुळे यांच्या बेजबाबदार वक्तव्याचा निषेध करून त्यांनी पत्रकारांची जाहीर माफी मागावी. असेही जलभूमी ग्रामीण पत्रकार संघाने प्रसिद्ध पत्रकात म्हटले आहे.

बावनकुळेंंचा जलभूमीकडे रोख ?

अहमदनगर दक्षिण लोकसभा मतदारसंघातील मतदारांना देवदर्शनावर दररोज लाखो रुपयांची उधळपट्टी करत असल्याने खा.सुजय विखे यांच्याविरोधात ऑगस्ट -2023 शेवटच्या आठवड्यात दै.जलभूमीने मालीकेतून आवाज उठवला होता. कालच्या वक्तव्याचा रोख जलभूमीच्या बातम्याकडे होता.असे उपस्थित कार्यकर्त्यांमध्ये चर्चा होती.